जोमसोम, मुस्ताङ । प्रदेश अस्पताल जोमसोमको कार्यालय प्रमुखमा नवौँ तहका एमडीजीपी चिकित्सक डा. कमल न्यौपाने नियुक्त भएर आएका छन्। अस्पताल परिवारले एक कार्यक्रम आयोजना गरी नयाँ कार्यालय प्रमुख डा. न्यौपानेलाई स्वागत गर्दै सफल र उपलब्धिमूलक कार्यकालको शुभकामना व्यक्त गरेको छ।
डा. न्यौपानेको नेतृत्वमा अस्पतालको स्वास्थ्य सेवा थप प्रभावकारी, गुणस्तरीय र सेवाग्राहीमैत्री बन्ने अपेक्षा अस्पताल परिवारले गरेको छ। भौगोलिक विकटता, प्रतिकूल मौसम र सीमित स्वास्थ्य पूर्वाधार रहेको हिमाली जिल्ला मुस्ताङमा चिकित्सकको भूमिका उपचारमा मात्र सीमित नभई नागरिकको जीवनरक्षा र स्वास्थ्य सुरक्षासँग समेत जोडिएको छ।
विशेषगरी मुस्ताङमा स्थानीय नागरिकसँगै मुक्तिनाथ दर्शन तथा पर्यटकीय गतिविधिमा आउने आन्तरिक र बाह्य पर्यटकलाई आकस्मिक स्वास्थ्य सेवा उपलब्ध गराउनु अस्पतालको महत्वपूर्ण जिम्मेवारी हो। उच्च हिमाली भेगमा चिसो, उचाइजन्य स्वास्थ्य समस्या, दुर्घटना तथा अन्य आकस्मिक अवस्थाको जोखिम रहने भएकाले दक्ष चिकित्सक, आवश्यक औषधि, उपकरण र प्रभावकारी उपचार व्यवस्थापन अपरिहार्य मानिन्छ।
नयाँ नेतृत्वले जिल्लाभित्रै गुणस्तरीय उपचार सेवा विस्तार, आकस्मिक स्वास्थ्य सेवाको सुदृढीकरण र उपलब्ध जनशक्ति तथा स्रोतसाधनको प्रभावकारी परिचालनमा प्राथमिकता दिनुपर्ने देखिन्छ। दुर्गम क्षेत्रमा चिकित्सकको निरन्तरता र आवश्यक कार्य वातावरण सुनिश्चित गर्नु पनि स्वास्थ्य सेवा सुधारको महत्वपूर्ण पक्ष हो।
यसैबीच, अस्पतालमा विगत एक वर्षदेखि कार्यरत चिकित्सक डा. रविन्द्र राज बास्तोलालाई बिदाइ गरिएको छ। लोकसेवा आयोगको परीक्षामा सफलता हासिल गरी नयाँ जिम्मेवारीतर्फ अघि बढेका डा. बास्तोलाले अस्पतालमा पुर्याएको योगदानको प्रशंसा गर्दै अस्पताल परिवारले आगामी कार्यकाल सुखद र सफल रहोस् भन्ने शुभकामना व्यक्त गरेको छ।
हिमाली जिल्लामा स्वास्थ्य सेवा प्रभावकारी बनाउन चिकित्सकको उपलब्धता, सेवाप्रतिको प्रतिबद्धता र संस्थागत व्यवस्थापन उत्तिकै महत्वपूर्ण हुन्छन्। त्यसैले प्रदेश अस्पताल जोमसोमलाई मुस्ताङवासीको भरपर्दो उपचार केन्द्रका रूपमा विकास गर्दै नागरिकले जिल्लाभित्रै सहज र गुणस्तरीय स्वास्थ्य सेवा पाउने वातावरण निर्माण गर्नु नयाँ नेतृत्वको प्रमुख जिम्मेवारी रहनेछ।
प्रदेश अस्पताल जोमसोम परिवारले डा. न्यौपानेलाई स्वागत तथा डा. बास्तोलालाई बिदाइ गर्दै दुवैको आगामी कार्ययात्रा सफल रहोस् भन्ने शुभकामना व्यक्त गरेको छ।
प्रतिक्रिया दिनुहोस्