कात्तिक १३ र १४ गते मौसम प्रतिकूल हुने पूर्वानुमान, उच्च हिमाली क्षेत्रमा यात्रा नगर्न अनुरोध
जोमसोम, मुस्ताङ । पश्चिमी वायु तथा सम्भावित मौसमी प्रणालीको प्रभावले कात्तिक १३ गते शुक्रबारदेखि १४ गते शनिबारसम्म गण्डकी प्रदेशका विभिन्न स्थानमा मेघगर्जन, चट्याङ र असिनासहित मध्यमदेखि भारी वर्षा हुन सक्ने पूर्वानुमान गरिएको छ। उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम औँल्याउँदै जिल्ला प्रशासन कार्यालय मुस्ताङले स्थानीय बासिन्दा, पर्यटक, पदयात्री तथा यातायात व्यवसायीलाई उच्च सतर्कता अपनाउन आग्रह गरेको छ।
जिल्ला प्रशासन कार्यालय मुस्ताङले २०८३ कात्तिक १० गते जारी गरेको सार्वजनिक सूचनामा नेपाल मौसम विज्ञान विभागको विशेष मौसमी बुलेटिनलाई आधार बनाउँदै सम्भावित विपद्बाट हुने जनधनको क्षति न्यूनीकरणका लागि पूर्वतयारी गर्न अनुरोध गरेको हो। विशेषगरी उपल्लो मुस्ताङ, लोमान्थाङ, कोरला नाका आसपास तथा उच्च हिमाली पदमार्गतर्फ जाने पर्यटक र पदयात्रीलाई मौसमको आधिकारिक जानकारी नलिई यात्रा नगर्न तथा प्रतिकूल मौसमका बेला सुरक्षित स्थानमा रहन आग्रह गरिएको छ।
भारी हिमपात र हिमआँधीका कारण दृश्यता घट्ने, सडक तथा पदमार्ग अवरुद्ध हुने र यात्रु बीचबाटोमै फस्ने जोखिम रहन्छ। हिमपहिरोको सम्भावना भएका क्षेत्रमा थप सतर्कता आवश्यक रहेकाले मौसम बिग्रिएपछि गन्तव्यतर्फ अघि बढ्ने जोखिम नलिन प्रशासनले आग्रह गरेको छ। प्रतिकूल मौसमले सडक यातायात र हवाई उडानसमेत प्रभावित पार्न सक्ने भएकाले यात्रुले प्रस्थान गर्नुअघि सम्बन्धित निकायसँग सडक तथा उडानको अवस्थाबारे जानकारी लिनुपर्नेछ।
सम्भावित जोखिम व्यवस्थापनका लागि स्थानीय तह, सुरक्षा निकाय, पर्यटन तथा यातायात व्यवसायी र सम्बन्धित सरकारी कार्यालयबीच समन्वय प्रभावकारी बनाउनुपर्ने देखिएको छ। जोखिमयुक्त क्षेत्रमा रहेका व्यक्तिको अवस्थाबारे जानकारी राख्ने, आवश्यक उद्धारको तयारी गर्ने र मौसमसम्बन्धी चेतावनी समयमै सर्वसाधारणसम्म पुर्याउने कामलाई प्राथमिकता दिन आवश्यक छ।
प्रशासनले मौसमसम्बन्धी अद्यावधिक सूचना नियमित रूपमा लिन, हिमपात वा हिमआँधीका संकेत देखिए सुरक्षित आश्रय लिन र जोखिमयुक्त क्षेत्रमा प्रवेश नगर्न सर्वसाधारणलाई अनुरोध गरेको छ। कात्तिक १३ र १४ गतेको मौसम पूर्वानुमानलाई ध्यानमा राख्दै अनावश्यक यात्रा स्थगित गर्न र सम्बन्धित निकायको निर्देशन पालना गर्न आग्रह गरिएको छ। समयमै अपनाइने सावधानी र पूर्वतयारीले सम्भावित मानवीय तथा भौतिक क्षति न्यूनीकरण गर्न महत्त्वपूर्ण भूमिका खेल्नेछ जिल्ला प्रशासन कार्यालय जोमसोम मुस्ताङका प्रमुख जिल्ला अधिकारी पर्शुराम पोखरेलले सूचना जानकारी गराएका छन्।
प्रतिक्रिया दिनुहोस्