मुस्ताङ । खाद्य व्यवस्था तथा व्यापार कम्पनी लिमिटेड, शाखा कार्यालय जोमसोमले आफ्नो कार्यालयबाट बिक्री हुँदै आएका विभिन्न खाद्यान्न सामग्रीहरूको नयाँ मूल्य सूची सार्वजनिक गरेको छ। कार्यालय प्रमुख अशोक यादवद्वारा जारी सूचना अनुसार, यो संशोधित मूल्य दर २०८३ साल असार १२ गते (२०८३।०३।१२) देखि नै पूर्ण रूपमा कार्यान्वयनमा आइसकेको छ। उपभोक्ताहरूलाई सुलभ दरमा अत्यावश्यक सामग्री उपलब्ध गराउने उद्देश्यले यो कदम चालिएको यादवले जानकारी दिए ।
नयाँ सूची अनुसार, २५ के.जी. को अरुवा सोना मन्सुली चामलको मूल्य १२२५ रुपैयाँ र २५ के.जी. कै FRK स्टिम जिरा मसिनो चामलको मूल्य १८२५ रुपैयाँ कायम गरिएको छ। त्यसैगरी, मुसुरो दाल (ठुलो) प्रति के.जी. १५५ रुपैयाँ र मास दाल प्रति के.जी. २०० रुपैयाँमा बिक्री हुनेछ। तेलतर्फ, सुरुचि सनफ्लावर तेल प्रति लिटर २९० रुपैयाँ र सुरुचि तोरी तेल प्रति लिटर २७० रुपैयाँ निर्धारण गरिएको छ। साथै, चिनीको मूल्य प्रति के.जी. १०० रुपैयाँ तोकिएको छ।
यसका साथै, स्थानीय उपभोक्ताहरूको सुविधालाई ध्यानमा राख्दै कार्यालयले एक महत्त्वपूर्ण निर्णय सार्वजनिक गरेको छ। अबदेखि बिदाको दिनमा पनि कार्यालय खुल्ने व्यवस्था मिलाइएको छ । नियमित सेवा प्रवाहमा थप सहजता ल्याउने र दुर्गम क्षेत्रका बासिन्दाहरूलाई लक्षित गर्दै यस्तो निर्णय गरिएको कार्यालयले जनाएको छ। यस व्यवस्थाले स्थानीय स्तरमा खाद्यान्नको सहज उपलब्धता सुनिश्चित गर्न मद्दत पुग्ने विश्वास गरिएको छ।
प्रतिक्रिया दिनुहोस्